Ceyhun Bayramov Çavuşoğlu ilə görüşdü - Foto

Ceyhun Bayramov Çavuşoğlu ilə görüşdü
Oxunma sayı: 1239

Azərbaycan xarici işlər naziri Ceyhun Bayramov türkiyəli həmkarı Mövlud Çavuşoğlu ilə Türkmənistanda görüşüb.

“Qafqazinfo” xəbər verir ki, bu barədə M.Çavuşoğlu Tvitterdə məlumat yayıb.

“Can Azərbaycanın xarici işlər naziri əziz qardaşım Ceyhun  Bayramovla bölgəmizdə baş verən son hadisələrlə bağlı danışdıq. Biz birlikdə işləməyə davam edəcəyik”, - Çavuşoğlu bildirib.

Qeyd edək ki, bu gün Türkmənistanda İqtisadi Əməkdaşlıq Təşkilatının Zirvə görüşü keçirilir.

***

XİN Ceyhun Bayramov və Mövlud Çavuşoğlunun görüşünə dair məlumat yayıb.

Bildirilib ki, İqtisadi Əməkdaşlıq Təşkilatının (İƏT) Xarici İşlər Nazirləri Şurasının Aşqabad şəhərində keçirilən iclası çərçivəsində xarici işlər naziri Ceyhun Bayramovun Türkiyə Respublikasının xarici işlər naziri Mevlüt Çavuşoğlu ilə görüşü keçirilib.

Nazirlər ikitərəfli əməkdaşlıq gündəliyinin aktual məsələlərini müzakirə ediblər.

Tərəflər bölgədə mövcud olan cari vəziyyət, üçtərəfli bəyanatların icrası ilə bağlı məsələlər, azad olunmuş ərazilərdə həyata keçirilən yenidənqurma prosesi çərçivəsində Azərbaycan tərəfindən görülən işlər barədə fikir mübadiləsi aparıblar.

Tərəflər, həmçinin beynəlxalq təşkilatlar çərçivəsində əməkdaşlığın uğurla davam etdirilməsi və qarşılıqlı maraq doğuran digər məsələləri müzakirə ediblər.