“7 min vermədim, kameranı mənə tutub canlı yayım açdı”

“7 min vermədim, kameranı mənə tutub canlı yayım açdı”
Oxunma sayı: 5118

Bakı Ağır Cinayətlər Məhkəməsində bloqer Ata Abdullayevin cinayət işi üzrə məhkəmə prosesi keçirilib.

“Qafqazinfo” xəbər verir ki, bugünkü iclasda zərərçəkənlər ifadə verib.

Sabiq MTN əməkdaşı Elçin Əliyev bildirib ki, Ata Abdullayev hədə-qorxu gələrək ondan 15 min manat pul tələb edib: “2020-ci il yanvarın sonları idi. Dostlarım zəng elədi ki, Ata Abdullayev gəlib mənim Sabunçudakı torpaq sahəmə baxış keçirir. Səhəri gün yenidən ora gəldi. Dedi ki, əlində bu ərazidə ağacların kəsilməsinə dair video var. Guya mən ağacları kəsib yerində bina tikəcəyəm. Dedi ki, ya mənə 15 min manat verəcəksən, ya da bu videonu yayıb səni biabır edəcəyəm. Mən də dedim ki, get nə bilirsən elə. Fevralın 3-də dedilər ki, Ata Abdullayev Ekologiya və Təbii Sərvətlər Nazirliyinin nümayəndələri ilə yenidən mənim ərazimə gəlib. Getdim ki, nə məsələdir. Mənə dedi ki, sənə sözümü demişdim, hələ görəcəksən. Dedim ki, hər nə çəkmisənsə, lazım deyil, yayma. Sonra uşaqlar dedi ki, çəkdiyi videoları internetə yükləyib”.

Zərərçəkmişin sözlərinə görə, ərazidəki ağacları əslində vaxtilə ora əkmiş başqa bir kişi çıxarıb aparıb öz bağında əkib. Məlum olub ki, hadisə vaxtı ərazi E.Əliyevə məxsus olmayıb. Ərazinin çıxarışı olmayıb və E.Əliyev orada icarədar olub.

A. Abdullayevin vəkili bildirib ki, ərazidəki ağacların kəsilməsi həqiqətən qanunsuz olub və bununla bağlı ETSN cərimə də tətbiq edib.

Zərərçəkmiş şəxsin Ata Abdullayevdən hər hansı maddi tələbi olmasa da, nüfuzuna və şəxsiyyətinə xələl gəldiyini əsas gətirərək onun cəzalandırılmasını istəyib.

Daha sonra digər zərərçəkmiş Cəmil Babayev ifadə verib. O, A. Abdullayevin hədə-qorxu ilə ondan 7 min manat istədiyini deyib: “2020-ci ilin noyabrında Yasamal rayonunda mənə məxsus obyektin qabağında küləyin təsirindən ağac aşıb orada dayanan maşının üstünə düşmüşdü. Müvafiq qurumlara məlumat verdik, səhəri günü gəlib baxdılar, ağacı kəsdilər. Həmin vaxt Ata Abdullayev gəldi ki, sən bunu qəsdən eləmisən. Obyektinin qabağı olduğu üçün ağacı kəsdirirsən. Mənə dedi ki, “7 min manat verməsən, video çəkib paylaşacağam”. Mən etiraz edəndə video çəkib, kameranı mənə tərəf tutub, canlı yayım açdı. Şərhlərdə mənə ağır söyüşlər söyürdülər”.

Cəmil Babayev maddi tələbi olmadığını, cəzasını məhkəmənin mülahizəsinə buraxdığını deyib.

Proses noyabrın 2-də davam etdiriləcək.

Qeyd edək ki, A. Abdullayev bu ilin mart ayında Dövlət Təhlükəsizliyi Xidməti tərəfindən saxlanılıb. O, Cinayət Məcəlləsinin 182.2.2-ci (hədə-qorxu ilə pul tələb etmə) maddəsi ilə təqsirli bilinərək barəsində həbs qətimkan tədbiri seçilib.

Amin Nəzərli